وصفة افريقية بالشمع ساهلة للقبول و المحبة فخاطر مكوزات السعد

سحيحراتي الجميلات اش خباركم ؟

اليوم غنشارك معاكم طريقة افريقية من سحر الهوودوو كتصلاح بدرجة اولى للقبول بالنسبة الا كنتي مكوزة السعد بحالي و ما عندكش القبول مع الرجال و ثانيا للمحبة بينك و بين بوركابي ديالك ولا راجلك، ماشي تهييج و لكن غير باش محبتكم تزيد او تخلي قلبو حنين و يتصالح معاك لكتنو مخاصمين، ديري فبالك ان هاد الوصفة بحال اي وصفة غيرها النجاح او الفشل ديالها فيدك انتي، مديريهاش الا كانت شاعلة فقزيبتك العافية و باغة تشوفي النتيجة فساعتها ولا عندك شك فيها او ممقتانعاش بيها او نفسيتك محطمة و فيك الغمة...
يلا باركة من الهضرة، ندوزو للمكونات :

- شمعة لون وردي او احمر والا معندكش تجيبي وحدة بيضا.
تكوني غسلتيها يوم قبل من اليدين لي قاسوها بماء ورد او ماء البحر ولا غير حطيها تحت روبيني.
- عسل كما كان و من الاحسن يكون حر
- شوية سكر سانيدة
- شوية القرفة مطحونة
- طبسيل مقاوم للحرارة فين تحطي الشمعة
- عويد الند ولا بخور زوين او بخور نسائي (تيكون في محلات الخليج)

الا كنتي محتاجة لشمعة من اجل المحبة او الصلح خاصك تكتبي فيها، متخافيش ماكينش اسماء جن، ختاري بين
- شي حاجة ديال الدهب او الفضة مثلا الحلقات ديال ودنيك
- عود ورد
- عود اسنان

الطريقة :
1 للقبول و جذب الحب لحياتك
غطي شعرك بزيف، شعلي البخور و دوري شمعتك فوق منو فاتجاه عقارب الساعة، خودي من العسل بصبعك و لحسيه، حطي نقطة في الطبسيل و نقطة باش دهني الشمعة كلها الا الفتيل، رشي عليها شوية السانيدة و شوية القرفة غيييير شوية ماشي تمرمديها و تعمريها تكولي غتقلي حوتة، ضمري على شنو باغة يعني لاش نتي باغية هاد الشمعة ؟ بعود ديال لوقيد من الاحسن سخني قاع الشمعة من بعيد باش متكحالش لينا و تبتيها في الطبسيل، و ملي تكوني كتشعلي فيها تكلمي بداكشي لمضرتي عليه فخاطرك، دعي الله مثلا يرزقك الرجل اللي يفهمك و يحبك مثلا.

2 للمحبة بين الحبانات او الصلح بينهم
الكتابة نهائيا متكونش بالحديد بحال ابرة خياطة او ساروت مثلا، و طريقة الكتابة هي كتالي
شدي الشمعة عرض، بداية من قاعها تكتبي بأي لغة بيغيتي و بلا نقاطي سميتك تخلي مسافة و تكتبي سميتو، شدي الشمعة الشمعة طول دابا و فديك المسافة لي خليتي بين الاسماء ديالكم غتكتبي شنو باغة بينكم، مثلا بغيتيه يتصالح معاك ؟ غتكتبي كلمة "صالحني" و تعاوديها حتى تجيبي الدورة ديال الشمعة و حاولي متخليش مسافة بين الكلمات.
تبعي الخطوات لي دكرت في الطريقة الاولى غير فاش تجي تشعليها تكلمي بشنو باغية يكون بينكم ولا طلبي الله يحقق ليك داكشي بينكم.

اضافة :
الخدمة تكون في السطح او الباكو من الاحسن ولا غير حدى شي شرجم، البلاصة فين تخدمي تكوني مسيقاها بالما و الملح و راشة عليها من الريحة العزيزة عليك، ضروري ضروري ضروري ما يدخل عليها ولا يشوفها حتى واحد منغيرك و ماتعودي لحتى واحد عليها حتى يتحقق ليك المراد و شاركيها ديك الساعة مع الصحابات و الحبابات، من الاحسن تخدميها في اول الشهر العربي او ليلة يكون فيها القمر كامل و واضح، تبعيها 3 ايام او 7 ايام سوى بنفس الشمعة او كل نهار شمعة، غير مهم بزاف متنفخيش على الشمعة، طفيها بمعلقة او كاس مثلا، تقدري تزيدي اي حاجة من عندك، مثلا تحطي الورد فطبسيل ولا الحرمل ولا اي حاجة كتحسي انها ممكن تزيد فعالية الوصفة، السكر و العسل دورهم يحليوك بين الناس او يحليوك فعينين حبيبك، القرفة كتعطي دفء المشاعر + دفعة للخدمة باش تصدق.