تفوسيخة بشمع اسود وابيض خاص بالازواج والاسر واللي امورهم واقفة ومعكسة

السلام عليكم
هاد الوصفة مزيانة بزاف خصوصا للدار اللي نايضة فيها المضاربة, للزوجين اللي تعمل سحر التفريق او الاسرة اللي مابقاش الرب ديالها كيشوف في مرتو او اولادو بسبب السحر او انسان معكس لو كلشي وكثر عليه السحور. هاد الوصفة خاصها شمعة كحلة وشمع ابيض بعدد الاشخاص اللي بغيتو تفسخو ليهم ’ مثلا امرأة وراجلها وجوج ولاد غايخصوها شمعة كحلة واربع شموع بيضاء. كاين الناس اللي كيخاف من الشمع الاسود بسبب انه كيتستعمل في اعمال الشر, صحيح انه كيتستعمل في اعمال الشر ولكن من تجاربي ومعرفتي الخاصة كنعتابرو سيد الشموع واقواها فيما يخص التفوسيخ واقوى من الشمع الابيض اللي هو كينقي اكثر ما كيفوسخ وهاد الوصفة مزيانة لبغيتو تعملوها للشخص البعيد بشرط يكون عندكم الاثر ديالو او شي حاجة كان لابسها وما تغسلاتش او شرويطة. الوصفة ما غنخفيهاش وغنعطيها لوجه الله غير دعيو معايا ولو بظهر الغيب . بلا ما نطول عليكم نعطيكم الوصفة اللي هي ساهلة ولكن فيها الوقت وخاصها التركيز
مدة العمل 7 ايام ممكن يتعمل ما بين 15 لاخر الشهر العربي ابتداء من نصف ساعة قبل المغرب
غادي تحتاجو :
شموع بيضاء بعدد الاشخاص اللي غيتعمل ليهم العمل لكل يوم
شمعة سوداء لكل 4 شمعات بيضاء الى زاد العدد جيبو شمعة كحلة اكبر ولا ملقيتوش من الحجم الكبير زيدو شمعة كحلة اخرى
زيت الخروع
زيت الزيتون
الحرمل السالمية ورق سيدنا موسى قرفة ازير( ازير مزيان الى كان المراة اللي غاتعمل هاد العمل اكثر من الرجل) اوكاليبتوس يكون هاديشي مطحون ومخلط يا كلو يا البعض منو
اثر الشخص في حالة ما يمكنش تزعمو عليه وتدوزو الشمع الابيض عليه او كان بعيد
الطريقة
الليلة اللي قبل من العمل غادي تبيتو الشموع في الملحة الحية او ملح البحر اللي بلا يود, لليلة كاملة الغد ليه حرقو الملحة ورميوها في خلا او البحر المهم بلاصة بعيدة على الدار
يوم العمل خاص الخلوة والهدوء والانسان يكون بالو مرتاح , صليو ركعتين او ممكن تعملو تامل ولا تسمعو الموسيقي المهم ديرو الحاجة اللي تخليكم مرتاحين
تشعلو بخور او عود الند او اللي حبيتو في مكان نقي وتكتبو على كل شمعة اسم صاحبها فلان ولد فلانة او فلانة بنت فلانة وتدوزو كل شمعة على جميع انحاء الجسم ديال الشخص المعني بالامر او تمسحوها مزيان بالاثر ديالو بحال تيشورت اللي كان لابسو, غير الشمع الابيض
غادي تشدو الشمع الابيض تدهنوه من الوسط للاسفل ومن الوسط للاعلى بزيت الزيتون وتشدو الشمعة السوداء وتدهنوها بنفس الطريقة بزيت الخرواع وتمرمدوها في داك الخليط وتحطوها في الوسط والشموع البيضاء محيطة بها
قبل ما تشعلوهم يقراء الاتي
بسم الله الذي لا يضر مع اسمه شيء في الأرض ولا في السماء وهو السميع العليم 3 او 5 او 7 مرات
اعوذ بكلمات الله التامات من شر ما خلق 3 او 5 او 7 مرات
الفاتحة 3 او 5 او 7 مرات
الفلق 3 او 5 او 7 مرات الناس 3 او 5 او 7 مرات الاخلاص 3 او 5 او 7 مرات الكافرون 3 او 5 او 7 مرات اية الكرسي 3 او 5 او 7 مرات اية 54 و 55 و 56 من سورة الاعراف مرة وحدة
الصلاة على النبي واله 3 او 5 او 7 مرات
تشعلي الشمعة الكحلة هو الاول وعاد شعلي الشموع الاخرين وديك الساعة تّأملي فيهم وقراي
بسم الله الرحمن الرحيم
يا الله يا من رجائي فيه كبير اني توجهت اليك وطرقت بابك بعد ان اغلقت في وجهي كل الابواب وضاقت بي الدنيا وعلمت انك كريم وعطوف يا رحمن يا رحيم , يا حنان يا منان يا عفو وتحب العفو, اللهم اني استغفرك من كل ذنب اذنبته واسالك بحق موسى بن عمران كليمك ونبيك الذي جعلته وجيها في الدنيا والاخرة ان تصل على محمد وال محمد وتفك ضائقتي وتبطل عني (وعن زوجي واولادي او اي واحد بغيتي) عمل كل ساحر وساحرة وفاسد وفاسدة وتجعل عملهم هباء منثورا بسْمِ الله وَبِالله بِسْمِ الله ماشاءَ الله وَلاحَولَ وَلاقوَةَ إِلاّ بِاللّهِ. قالَ موسى ما جِئْتُمْ بِهِ السِّحْرُ إنَّ الله سَيُبْطِلَهُ إنَّ الله لايُصْلِحُ عَمَلُ المُفْسِدينَ فَوَقَعَ الحَقُّ وَبَطَلَ ما كانوا يَعْمَلونَ فَغَلَبوا هُنالِكَ وَانْقَلَبوا صاغِرينَ, اللهم فانصرني على من ظلمني كما نصرت موسى بن عمران عليه السلام على فرعون وملئه, وصلى الله على سيدنا محمد وعلى ال سيدنا محمد والحمد لله رب العالمين
من بعد خليهم يكملو وديرو العمل لمدة 7 ايام,
في حالة ما بقا حتى اثر مزيان في حالة الشموع تركت اثر خصكم ما تخلطوش بقايا الشمع الاسود مع الابيض.
الشمع الابيض تجمعوه تدفنوه في بلاصة تحت شجرة زيتون او نخلة او في محبق زاهر
الشمع الاسود تجمعوه وتلفوه بثوب بحال الكفن و تدفنوه في مقبرة ويستحسن في مقبرة منسية بحال داك السحر اللي معمول اعتبروه مات وتدفن وتنسى
والله يسهل على الجميع
هادي من اقوى الوصفات في حالة لكانت الوحدة كتعاني سنين طويلة من السحر ومتراكمة عليها هاد السنين وواقف حالها من جميع النواحي ممكن تبدى بيها وتتبعها بوصفة الفتح بالشموع را غادي ان شاء الله نحطها باش يتفتحو ليها البيبان ويتحيدو العراقيل بمرة , اما هاد الوصفة را تقضي على كلشي
والله ييسر للجميع